سكرات الميلاد

(1)
ابن الحيرة

**
أنا!
أنا الطير
اللي رافض يكون نسر
ورافض يكون..فريسة لنسر
طير..قلبه مليان خير
كان نفسه يبني..لغيره ولنفسه
بدل العش..ألف عش
على ألف غصن..وعلى كل غصن
نفسه يغني
أجمل لحن..مليون لحن
ولما جا يبني لنفسه عش
كان يوم برد
شح القش..قام مقدرش
ومكملش
قال :راح اغني
حسّه انحاش
ومغناش
***
أنا المسافر..
عند المفارق
ما اعرف جاي..ولا مفارق
عايز امشي في الطريق
عايز أجرب كل المسالك
مره التفت للجاي..مره اتعثّر في اللي رايح
مره أحب كل حَيّ..مرة تضيق بيّ المطارح
مرة..ومرة..ومرة
مرة حلوة
مرات مُرّة
وأنا لسه واقف عند المفارق
مش عارف فين رايح
بس أكيد..لازم أفارق
لازم اختار طريقي
وما اختارتش
وحتى لسه..ما فارقتش
***
أنا القلم
خاطط مجامع الكلم
كلمة أمل..كلمات ألم
نفسي أكتب ألف كلمة..وألف كتاب
لكني باعمل ألف حسبة..وألف حساب
أكتب إيه!..وازاي راح اكتب
مين هيقرا..ومين هيدرى
وهيقول إيه..وإيه هيجرى
ولا اخدها من قاصرها
وبلاش أكتب
ولاقتني في النهاية..
ما بكتبش
رغم ان الحبر لسه حي جوايا..
مانشفش
(......)
ولسايا
مابكتبش
***
أنا الحجر
لكني حاسس إني..مش زي باقي الأحجار
أكون طوع للي يبني..أي بيت أو أي جدار
يمكن مش عايز أكون مقدس..أو أكون مزار
أو تمثال في متحف أو بازار
وعارف ان عمري ما هاكون حاجه
خارج بناء أو جدار
لكني عايز اعرف
أي بيت!..وهياوي مين!
أي سور!..هيحيط بإيه!
أي جدار!..وهيحوي إيه!
وافضل اسأل
واسأل..واسأل
ومن حقي..ما انا حجر
مش طوبة نية..تبوشها المية
ولا قالب..زي كثير من القوالب
يمكن أحجار كثير..تشبهني
لكن..زيي بالتفصيل
ما اعتقدش
=طب قررت!
-ما قررتش
***
أنا الحيرة
صابت عقلي
زي ما صابت عقل
ناس كثير
وهتلاقي ناس..كثير
هتقول كلام كبير:
"احنا عارفين
منين جايين..ولفين رايحين
ومنظمين..ومخططين"
كذابين
أو على الأقل..مش مدركين
إنهم
وزيهم
ناس كثيرة
ماشيين..لكنهم مصيرين
ما لهمش خيرة.
***
انا اللي اتولدت
وحسبت
أن دنيتي الصغيرة
هي الدنيا الكبيرة
وقالولي: أطلع
خطي..وادرس
واكبر
هتلاقي مكانك فوق
وكبرت
وطلعت
وفي كل خطوة باكتشف
إني مش طالع لفوق
ولكن .. بحاول أطلع ..من تحت
ولاقيت الدنيا كبيرة..كبيرة
ما قدرتش اطلع لفوق
ومش قادر اعيش تحت
***
أنا نسل جيل
رسم..وحلم
وفجة حلمه ضاع
يعنى أنا "مش في الضياع"
أنا ابن الضياع
ابن عصر البيع
وعلى رأي اللي قال
"هما باعوا الجلابية..والوطن والبندقية"
وصدق فيما قال
مدد يا إمام

وانباعت المصانع
والمزارع..صبحت وسيّة
وانداست الأرض..والعرض
والأمة..والقضية
وانباع امبارح..واليوم
وبكره..والسنين اللي جاية
جيل بينباع من الميلاد
حتى الممات
لدرجة اني اعتقدت ان أمي
الله يسامحها
ما راحتش تولدني
في "قسم الولادة"..في مستشفى الجلاء
ودخلت على عمر افندي
"قسم المبيعات"
وقال بتقول عليّ: "ابني الحيلة"
وانا في الحقيقة: "ابن الحيرة"
************************************************

************************************************

(2)
مشهد الختام

لا
لا أمل عندي في البقاء
ولا استعداد
لا
فقد حل موسم الرفض
لا
أخف على اللسان
تنتهي بصدر مفتوح
وتطلق عقال اللسان

لا وقت لدي..ولا جهد
لكلمة "نـ ـعـ ـم"
تنتهي بالوجوم
ليبدأ الإذعان
لا
لقيد
ولو كان من ذهب
لتابوت من البلور
لشِبَاك من حرير
***
لا
فقد انقشع ليل الخنوع
شمس النهوض أوشكت
على السطوع
نشرت ضياها وبددت
برك الدموع
والعين اليوم ابصرت
نورا
غير الشموع
***
لا
فصوت السفينة
يؤذن بالرحيل
إلى مرفأ بعيد
إلى أرض النور
فقد رسوت بالخطأ
على شاطئك المهجور
***
لا
فقد أعدت القطار
إلى القطبان
أسفي أنه بعد اول محطة
فقد المسار
الآن.. الوقت حان
ليكمل المشوار
***
لا
سأسدل الستار
عن مسرحية
تخلط كآبة مأساوية
وسخافة هذلية

اعتقدت يوما أني بطلها
بل وأني كاتبها
وصحوت
وأنا في ثياب الضحية

النص أقرب من لعنة
نحتت في كهف سحيق
أصابتني اللعنة
وصلبني المسوخ
والآن
لن أقبل دور الضحية
سأسدل الستار
في الفصل الأول

لا
ولو تلاعبت بألف سحر
ولو لبس المسخ
ألف وجه
وجه ملاك
أو ذئب
أوحمل
لا
فقد انفك السحر
وكفر قلبي بالسحر
وأبصرت عيني
بؤس المسخ.
************************************************

*************************************************

(3)
غريب

غريب
طعم الغربة وسط القرب
وأغرب
طعم الحضن لما يضن
ويصير سجن

***
غريب
ميلاد الحياة
بالآلام
شق الأبكار والأرحام
وحتى السِنّة للثة
وشق النبت للبذرة
وللأرض امها

وكأن الحياة بتقول بسخرية
"أنا كده..
بنت الألم"
***
غريب
لما احلم باللقاء
في آخر الطريق
وأغرب
لما يصير الفراق
فتحة طريق
***
غريب
صوت الليل زي الجيتار ساعات
وساعات، زي أنين النايات
***
غريب
لما يصير للصمت ألف لسان
وأغرب
لما يصيب الخرس كل حروف الكلام
***
غريب أمر الحروف تصنع بيمينها "أمل"
وبشمالها تصنع "ألم"
***
غريب
تمر عليّ ساعات ودقايق..
عمر طويل
وأغرب
لما وقفت في مكاني
يشيبني عفار السنين
***
غريب
ألاقي سكني في وجو اتنحتت جوايا
وأغرب
شعور الغربة لما أبص في مراية
***
غريب
أعيش لحظة
تمر ايام
تضيع من عيني ملامحها
ويبقى في قلبي إحساسها

***
غريب
لو في يوم يصير الحب سجن
وأغرب
لو في يوم تحب السجن
***
غريب
لما يصير للأفق..جدران
وقطبان
وأغرب
حجرة تصير أو سع من كل مكان..
وكل زمان.
***
غريب
زغلول قِمري
داير يدور عن عشه
عن أب وأم
والأغرب منه
هوَّ أمري
يفوت عمري
والاقي عشي
في حضن الأبن
***