بُكره

بُكره
(1)
حنين لبكره
من صغرنا،واحنا دايما نحلم ببُكره
بُكره العيد
بُكره نكبر
بكره بابا يجيي من السفر
نكبر ونحس ان النهارده صعب
نبني،ونبني،ونبني
احلام لبكره
ونعيش في بكره
وتمر ايام وأسابيع وشهور وسنين
تاخدنا دوامة الحياه
نعيش بين مر امبارح ونار النهارده
وفجأه
نحس بجنين بيتحرك من جديد جوه قلوبنا
ونحس بحنين
للحلم
للأمل
نحس بحنين لبكره

حنين لبُكره

حنين لبُكره
حنين تعود لي سنين صبايا
حنين تكون أيامي الجايه
حنين في يوم يخرس شقايا
:بصوت غنايا
حنين لبكره
***
حنين لبكره
حنين يا مصر تكوني تانية
جنة لينا وقطوفها دانية
وعلى ولادك إيديكي حانية
تنام عيونهم
.. تحلم قلوبهم
تحلم ببكره
***
حنين لبكره
حنين لوشوش سمرة ورضيه
بعرق جبينها زهور ندية
بإيديها صانعة لبكره هدية
وقوبها شايلة
حنين لبكره
***
حنين لبكره
يا جنين لبكره
لكلمة وفكره
بيشق عمره
في حشا النهارده
**
صرخة ميلاده
نصرة لجهاده
كسره لقيوده
برهان وجوده
**
خرس الأنين
بصرخة حنين
حنين لبكره

******************************************

*******************************************
(2)
آمين
ارحـل لبكرة، على الصـراط المستقيـم
أهـجر سنين مغضوب عليهــم
وازجـر وساوسك الضالين
رددآدان الفجرالجديد
و اهـمـس:
"آمين"

*******************************************

********************************************

(3)
الصبح
عاشق لنور الصبح..مداح الشمس
اطلع يانور الصبح..أطلق عقال النفس
واشفي بنسيم عليل.. صدر عليل
وأنوف.. زكمها عطن الأمس

رقيق الحس ما أعرف..ولاّ وشمني الضعف
بغزل عشوش الحب.. ولاّ حضن الأم
أكيد أنا إنسان..جسد وقلب وعقل
هي كده الحياة!..ولاّ الحياة..وهبتني كفلين من الهمّ


ما أحلى لسعة برد..وما أحلى ضمة دفا
تلذ ساعة صحو..وتلذ ساعة غفا
ما اشهى طعم الأماكن..والأوقات..والوجوه
ده يوم ما أصالح مرايتي..وأوصل زماني اللي عفا

انفض عباية الوهن..أزفر حشاش الصدر
زيل الدنس عن عقلك..وفك عنه السحر
حرر شباب القلب..وارشف كئوس الحب
قدس روح الحياة..وارسم لنفسك عُمر


*************************************

**************************************
(4)

الصبار

اصبر
ما يصبر على طول الألم
إلا شديد العود
اصبر
بعد الخريف..
زرع الأمل..
شديد هيعود
اصبر
في يوم هيخرس قرع الطبول..
ويبقى نشيد العود
اصبر
على عجز الايام..
وليدك جاي..
في يوم موعود
***

اصبر
ما لان صلب الحديد..
إلا بصبر النار
اصبر
بسعي النمل..
كم من جبل ينهار
اصبر
ولو الدنيا دارت إليك ظهرها..
أكيد في يوم وجهها..
إليك يندار
اصبر
في يوم وجه الصحاري هيبتسم..
بزهرة الصبار
******
اصبر
وشد لحاف الجَلَد على قلبك..
من برد الخوف
اصبر
وحلّي مُر صبرك بسلوى نغم وحروف
اصبر
على غربتك وهتلاقي السكن،
في قلب ألوف
***
اصبر
صبر الجمل سنين..
والحمل على ظهره
بارك يلوِّك هم سنين ويجتره
واقف شامخ
وما تدري ما بصدره
من يمنعه لو يوم..
برك على من قهره
***
اصبر
عسى بعد الليل نهار
عسى بعد السقم برء
اصبر
عسى بعد نزف الخمر..أمر
عسى بعد الكسر..جبر
***
اصبر
واسمع كلامي أنا
قليل الفرع
أصيل الجذر
صابرعلى عطش الايام
بطول العام
مستني
يوم يكللني
تاج النوار

..أنا الصبار
***

********************************************

*******************************************

(5)
أيهذا الراضي

أيهذا الراضي، بما فيك من داء
متى تصحو، ءإذا سقطتَ قتيلا

إن شر الجناة في الأرض نفس
لا ترى الخلاص إلا في الرحيلا

وترى الأمس من الوجود وتعمى
أن ترى الغد على الطريق إكليلا

فناضل اليوم ما دمت فيه
وقض مضجع الظلم حتى يزولا
..أو تزولا.