السبت، 5 يوليو 2008

قول يا نغم

(1)قول يا نغم



قول يا نغم
قول يا نغم

بالطبل داوي في الحواري وفي البيوت
دجال بيسحر في الرؤوس والناس سجود
تسكر مرار ليلها الغطيس
فَمَهْما كان أمرُه الخسيس
بتقول: نعم

قول يا نغم
قول يا نغم
***

للّقْمة حُكم..واللِئام مستحكمين
وجَملنا بارِك لُه زمان..ومستكين
جوعه وعطشُه وقهرُه ملو السنام
ويمر عام..من بعد عام
يمضغ ويجتر الألم

قول يا نغم
قول يا نغم

***

كان حلم وهم ..ولا أرض العلم بور
الشيب زحف.. قبل الأوان وحنى الضهور
العيب في رمي البذرة في ارض غيب
ولاّالعيب..
عيب الزمن

قول يا نغم
قول يا نغم
***

بُكره اللي جاي..ده يوم أكون أولا أكون
مافيش وسط..ولا اختيار..ولا ظنون
يا نقوم..وهيَّ القومة والخلاص
يانروح خلاص
في بير العدم

قول يا نغم
قول يا نغم
***




************************************************************************
(2)بهية

يا بهية وخبريني .. عملت إيه السنين
وياكِ يا ضي عيني .. وفي أرض الطيبين

راح فين ظل الشجر .. راح فين دهب السنابل
راح فين ضحك القمر .. راح فين دوح البلابل
و فين نخل البلح .. حدا الغيط المقابل
إيه مسّخ طعم تمره .. وعجّز الطالعين
آه ياعيني .. وعجّز الطالعين
***

قالت: شر الخلايق .. الاندال طرح المزابل
درسوا وجوهنا بنوارج .. حشوا رقابنا بمناجل
بتفتح ليه يا سائل .. في جروح الموجوعين
آه ياعيني.. في جروح الموجوعين
***

ده القهر زاد قهرين .. والفرق في الأسامي
وبعد كدح السنين .. راجعه الوسية تاني
سَنّ الراعي السكاكين .. وحامينا طلع حرامي
تضحك مقاديرنا واحنا .. بالدمع موعودين
آه ياعيني.. بالدمع موعودين
***

يا بهية وخبريني .. ع اللي قتل ياسين
قالت: ما ياما راحوا .. وتقصد أنهي ياسين

ياسين راح في الصحاري .. زي كتير من الولاد
حارب لاجل الكرامة .. وهدروا دمه، البُعاد

وياسين هجر وسافر .. يكدح في ابعد بلاد
يشقى لاجل المعايش.. واهو مات قبل الميعاد

وياسين راح وسط بلده .. مغدور باسم الجهاد
ما تفكر حبه عاد .. تقصد أنهي ياسين
***

وأهو ياما غيرهم عاشوا .. يعافروا في السنين
بيموتوا في كل لحظة .. ومحسوبين عايشين

تقصد ياسين الدارس .. زهرة كل المجالس
الحلم زهزه في عينه.. يصبح بقلمه فارس
دلوقت يا ولداه .. على قبر الحلم جالس

ولاّ ياسين الفاعل .. حاضن الخيش والمعاول
حرقوه كما الحطب .. لاجل يقيدوا المراجل
الطوق حكم رقبته .. كالعبد، والاسم عامل

بص ودور،يا عاقل .. هتلاقي مليون ياسين
الدهر حنى له ضهره .. وقضمت سِنُّه السنين
شوف كام ياسين ماتوا .. وكم عاشوا ميتين
آه ياعيني .. وكم عاشوا ميتين
***

يا بهية يا لحن فرحة.. يا غنوة للشباب
يامادّة للضِل طرحة .. لامّه كل الصحاب

هادفع لك ألف مهر .. وهاخبط ألف باب
اشغلي توب الفرح .. واخلعي ملس العذاب

قالت: العزا منصوب .. ومأذون بلدنا غاب

قالت لي:لملم حطامك .. وحل حبل الإيدين
اجبُر كسر الكرامة .. وامسح عار الجبين

روح دور على الطريق .. هتلاقي أكيد صديق
ترقيك عيون صبية .. ويدلك شاب زين
روح دور ،راح تلاقي
قدامك ألف بهية .. وفي ضهرك ألف ياسين.
آه ياعيني .. وفي ضهرك ألف ياسين.




**********************************************************************
(3)لمَّا كان


لمَّا كان الورد فَتَّح على الغصون
برغم الشوك ساحر جماله كل العيون
يهون مرار العمر وفوات السنين
بلمسة من خده الحنون
***

لمَّا كان النور بيجي بعد الظلام
وإن ده طبع الليالي والأيام
هغمض عيوني عن الأوهام
وافتحها على ضي الأحلام
***

لمَّا كان درب الأمل دايما طويل
لكن قدر ومالوش مفر ولا بديل
أنا ناوي اكمل في الطريق ده مهما طال
وكفايه إني لقيت سبيل
***

لمَّا كان صاحبي القديم هو القمر
وقلبي الأخضر لاكتماله ياما انتظر
من تاني حليت صحبته
وحلي لي على ضيُّه السهر
***

لمَّاكنت دايما بدور عن طريق
وعن صديق يشاركني في الحلم البريء
مكتوب لي بعد حيرة سنين
ألقى الطريق بعيون صديق
***

لمَّا كانت الرقاب رهن السلاسل
وسوط الظلم على الضهور طالع ونازل
لا بد للجلاد يدوق طعم السياط
ويجرب السجان سواد ليل الزنازن.
***





********************************************************************
(4)هيلا هيلا صلوا ع النبي

هيلا هيلا صلوا ع النبي

ع النبي صلوا
ابنوا وعلّوا
ع النبي صلوا

***

مرسالي..بلّغ أحوالي
لقريّب من قلبي وغالي
أمانة.. وصّل له مقالي
وما يهمش..ردّه على جوابي

هيلا هيلا صلوا ع النبي

ع النبي صلوا
ابنوا وعلّوا
ع النبي صلوا

***
محبوبي..قايد في لهيبي
لصغيّر..قلبي وقليبي
بيداري..ولاّ ما داري بي
وبناروا القايده في جنابي

هيلا هيلا صلوا ع النبي

ع النبي صلوا
ابنوا وعلّوا
ع النبي صلوا

***
باتطوّح..والأمس مروّح
والباكر..هالل بيلوّح
السكة..دايره وبتدوّخ
شدوني معاكم يا احبابي

هيلا هيلا صلوا ع النبي

ع النبي صلوا
ابنوا وعلّوا
ع النبي صلوا

***
يا ولدي.. يا قدري ووعدي
يا ناري..وضنايا في بعدي
سا محني..لو طوّل بُعدي
واغفر لي بعادي والنبي

هيلا هيلا صلوا ع النبي

ع النبي صلوا
ابنوا وعلّوا
ع النبي صلوا


********************************************************************
(5)دنيا تانية


بس لو نغمض عينينا.. في بحر ثانية
ونفتحها ، ونلاقينا..في دنيا تانية

بس لو تنسى قلوبنا..اللي فات في لمحة(ليالي جارحه)
بس لوتصبح دموعنا..لحن فرحة
ساعتها حقا ، دنيتنا تبقى، دنيا تانية

بس لوتشوف العين اللي حلمت..حلمها
بس لو تجمع الإيد اللي زرعت..قمحها
بس لو تلقى النفس اللي عملت..أجرها
ساعتها حقا ، دنيتنا تبقى، دنيا تانية

بس لو يكفي حبري..كل الكلام
بس لو يحط جارنا..كل الحمام
بس لونعيش في حلم..من غير ماانام
ساعتها حقا ، دنيتنا تبقى، دنيا تانية


بس لو في يوم دراعي..يضمها
بس لو خدي يلمس.. خدها
بس لو نمشي وكتفي.. بكتفها
ساعتها حقا ، دنيتنا تبقى، دنيا تانية

**********************************************************************
(6)مدوا الخُطى

مدوا الخُطى
مدوا الخُطى..واطووا الطريق قدامكم
هدوا الحجر..واتنوا الحديد بعنادكم
ده مهما يطول..آخره الوصول
وكفايه عرفتوا طريقكم
***

شدوا القلوع..على شط بكره الآتي
ما يهمكوش..من موج البحر العاتي
وسط البحور..قلبك جسور
ومصيره في لحظة يواتي
***

ياللا يا طالعين..نخل البلح أهو طايب
حاسبوا من الشوك..واوعاكوا الحبل الدايب
دا النخل ما يلين.. لإيدين خايفين
والتمرة ما يدوق عسلها..الفم الهايب
***

ياللي باني..ارفع وعَلّي بُناك
قيم جدرانك..مدماك ورا مدماك
افتح مِيت باب..لاجل الأحباب
ولاجل النور.. افتح مليون شباك

***
العيد قرب..ابسط يا عم السيد
الكبش النطاح..قَرَش العلف واتقيّد
بكفاية نطحُه..لا بد دبحُه
خَلّي الغلابة تعيّد

***
ده الكبش كبش..مهما كبرت قرونه
ومهما عمّر..ومهما طالت سنينه
حك السكاكين على المسن
دَمّع له عينُه
***



***********************************************************************
(7)جايز برضه بكره
(لحن)
ما بين صمت الحروف
تنطق عيون الكبت
وبين نايات الخوف
تقرع طبول الرفض

جايز تكون آخرة كلامنا.. لغط أو خرس
جايز تكون ثمرة عملنا.. هدر أو عبث

وجايز برضه بكره.. ما يطرحش بأماني
لكن لزما وحتما.. يكون له طعم تاني
***
وإيه تفرق صلاتنا في كنايس أو مساجد
وإيه يفرق برضه لوننا او نوعنا في البطايق
مادام لسوط الظلم بيخر الكل ساجد

جايز برضه بكره.. ما يطرحش بأماني
لكن لزما وحتما.. يكون له طعم تاني
***
كفايانا نقع ونسند على عكاز الانكسار
كفايانا نصوم ونفطر على تمرات المرار
وجايز برضه بكره.. ما يطرحش بأماني
لكن لزما وحتما.. يكون له طعم تاني
***
ما بين خريف اليوم
نزرع ربيع الغد
وبين هزل المسوخ
ننشد نشيد الجد
جايز برضه بكره.. ما يطرحش بأماني
لكن لزما وحتما.. يكون له طعم تاني

ليست هناك تعليقات: