السبت، 5 يوليو 2008

أناشيد الثوار

(1)خلص السكات(لحن)

خلص السكات..قطر الكلام قايم
يحيي اللي مات..ويفوق النايم
يرخي الستار..على أمسنا الغايم
يختم فصول..من قهر وهزايم

خلص السكات
قطر الكلام قايم

***
خلص السكات ..وما عادش له معنى
مر الحياة .. والقهر يمنعنا
كلمة نعم.. ذلتنا في حياتنا
وهنموت بعار..لولم نقول لأه

***
خلص السكات..والعضّ على الشفايف
ظل الحيطان..ما عاد يغيث خايف
بان للعيان..والكل بات عارف
كم من جبان ..من دمنا غارف
لو خفنا منه زمان.. بقى مننا خايف

اوعاكم تقولوا الشعب مات
أو راضي بالمظالم
خلص السكات
قطر الكلام قايم
***
خلص السكوت ..واتكلم العامل
حطم قيود..المارد الخامل
في موقعه وفي مصنعه..يقلق عدوه ويوجعه
صوت العنابر في المحلة..صار كل مصري بيسمعه

يغزل خيوط الأمنيات
ويجدل العزايم
خلص السكات
قطر الكلام قايم

***
خلص السكات..واتكلم الفلاح
جذره في ارضه..وفي إيده فاسه سلاح
دي أرضنا..بختم العرق
بوجودنا..مش حبر و ورق
تصبح قبور..ولا تنسَرَق

أرضي وعرضي للممات
ما افوتها للظالم
خلص السكات
قطر الكلام قايم

***
خلص السكات..واتكلموا الطلبه
تركوا الشاتات..والموضة والغلبة
انفتحت ساحات..للشاب والشابة
يمشوا الطريق..في رفاقة ومحبة
ماضي الحسام..ماتمنعه عقبه

ما احلى الولاد جنب البنات
ده بكره له نسايم
خلص السكات
قطر الكلام قايم

***
خلص السكوت..ونطقت يا صبية
وسط الحشود..بعلنها وقوية
عاشقك أنا..يا مهرة برية

أنا المهاجر من اللي فات
ولأمري أنا حازم
ما ابات بدمعة أو سهاد
وببكره أبات حالم
خلص السكات
قطر الكلام قايم
***
خلص السكات ..وهينطق الجندي
يقول مهنتي..أحمي ولاد بلدي
جنديتي ..عز وشرف
مش بهدلة..وذل وقرف


لا هتنّي سوط يكوي العباد
ولا درع للحاكم
شرف السلاح عمرُه ماخان
ولا عمرُه كان خاين
خلص السكات
قطر الكلام قايم
***
خلص السكات..قطر الكلام واصل
إسمع لصوت الإضرابات..هيلخص الحاصل:
اصحى يا مصري من كل مله ..قول حي على العصيان
اصنع مناجل من الأهلة ..وسيوف من الصلبان
فوقوا يا فقرا في بر مصر..يانوبي ياعربان
قصتنا قهر وجوع وفقر..مش لون ولا أديان
خلص السكات
خلص الكلام
قطر الثورة واصل
قطر الثورة واصل


******************************************************************************************************************************************************************
(2) عَلِّي الجدار
(إجهاض مظاهرة أمام مقام السيدة زينب، إحياءا لأحداث 18/19 يناير 1977)

عَلِّي الجدار .. عَلِّي الجدار
عَلِّي الجدار .. بعد الجدار
اكوي الديار .. بحديد ونار
انشر ظلام .. في عز النهار
وحط المقام .. تحت الحصار
عَلِّي الجدار.. عَلِّي الجدار
***
إخرِس لساننا .. واحكم قيودنا
اشفط عرقنا .. وثمار جهودنا
إيه راح يحوشنا .. لو انتفضنا
وإيه راح يحوشك .. من شعب ثار

عَلِّي الجدار.. عَلِّي الجدار

عَلِّي الجدار .. بعد الجدار
اكوي الديار .. بحديد ونار

عَلِّي الجدار.. عَلِّي الجدار
***
وسط الليالي .. خفافيش بترمح
وديابه بتعوي .. وكلاب بتنبح
وغفير حرامي .. بيسرق ويدبح
مهما حاشتنا .. الظلمة في بيوتنا
إيه راح يحوش .. نور النهار

عَلِّي الجدار.. عَلِّي الجدار

عَلِّي الجدار .. بعد الجدار
اكوي الديار .. بحديد ونار

عَلِّي الجدار.. عَلِّي الجدار
***
ُأءمر يا سيدهم .. ذئابك وسيبهم
تهبش وشوشنا .. ويهزوا ديلهم
راح ييجيى يوم .. و تدوق نيابهم
طبع الديابه .. تخضع لسيدها
وإن ساعة يسهى .. عليه تندار

عَلِّي الجدار.. عَلِّي الجدار

عَلِّي الجدار .. بعد الجدار
اكوي الديار .. بحديد ونار

عَلِّي الجدار.. عَلِّي الجدار

***
على سلو سوقك .. وكيف السمسار
ينحل وبرنا .. غول الأسعار

يمكن غلطنا..في طول سكوتنا
على من غدرنا .. وسف قوتنا
سبنا الهفايا .. تدوق دمانا
وفي النهاية .. صابها السُعَار


عَلِّي الجدار.. عَلِّي الجدار

عَلِّي الجدار .. بعد الجدار
اكوي الديار .. بحديد ونار

عَلِّي الجدار.. عَلِّي الجدار
***

كحّل عيونك .. واصبغ شعورك
خَشِّن في صوتك .. وازعق بزُورك
ما يخيلنا قولك .. و لاطبولك
تفضل، تفارق .. ده ما عادش فارق
هَمّ الليالي .. بقى موجه عالي
وموج ظلامك .. بقى في انحسار

عَلِّي الجدار.. عَلِّي الجدار

عَلِّي الجدار .. بعد الجدار
اكوي الديار .. بحديد ونار

عَلِّي الجدار.. عَلِّي الجدار
***
19/1/2008
******************************************************************************************************************************************************************
(3)أهو ده اللي صار(لحن)
أهو ده اللي صار وآدي اللي كان
ما لكش حق.. مالكش حق تلوم عليَّ
تلوم عليَّ إزاي يا سيدنا
وخير بلادنا.. وخير بلادنا، ما هوش بإيدنا
وإزاي بقى بتلوم عليَّ
****
قرب يا سيدي، وشوف وأسمع
أدي إيد بتبني، وإيد بتزرع، وإيد بتصنع
وإيد بتهدم، وإيد بتقلع،وإيد بتصفع
وكروش، مهما تبلع، ما تشبع
وبطون بتخدع جوعها بمية
وإزاي بقى بتلوم عليَّ
****
قصور سيادنا قايدة بفرايح
وبيوتنا عتمة،وأهو يوم ورايح
وقلنا،في الفرح، ما عاد مطارح
حتى الأحلام، زهدت منامنا
وإزاي بقى بتلوم عليَّ

****
كفتهم راجحة، وكيلنا طافح
شقى كثير، والرزق شاحح
وخيل الحكومة، ما عدش رابح
القلب من الهم في الدم سايح
بس الدموع في العين عصيّة
وإزاي بقى بتلوم عليَّ
***
أسياد قليلة بالعة الكثير
واحنا ياكثرة شاربين كثير
وحارس جنابه مليون غفير
وخطبجية وطبل ونفير
وسجون وقلعة أسوارها عالية
وإزاي بقى بتلوم عليَّ
****
نفوس أبيّة حنت قامتها
ونفوس دنيّة داست هامتها
العين بتبكي على كرامتها
بس قرصة الجوع قوية
وإزاي بقى بتلوم عليَّ
****
ولادك يا ارض حاسّين بشوقك
من شوقنا ليكي، اتنحتت شقوقك
في إيدينا وجبينّا، لكن حقوقك
ويّا حقوقنا،روحانا عرقنا، تحتك وفوقك
رايحين في عب صاحب الوسية
وإزاي بقى بتلوم عليَّ
*****
اشهد ياشايف، سجل يا سامع
غضب الغيطان، سخط المصانع
وفي الكنايس.. وفي الجوامع
رغم اللي حابس، رغم اللي طامع
لو لم يفوق صوتنا المدافع
ساعتها بس ابقى لوم عليّ
******************************************************************************************************************************************************************

(3)ياام العواجز

يا ام العواجز
القهر حاجز
ونابه ناغز
والسم نافذ

حتى الوتين
***
آه يا ام هاشم
ليه ليلنا عاتم
والفقر كاتم
على الصدر وقاصم

ضهر الملايين
***
يااخت الحسين
خلاصنا منين
والمهدي فين
ومين في زماننا

راح يهدي مين
***
آه يام هاشم
ردي المظالم
على حاكم ظالم
والرب عالم

بالمظلومين

***
مدديا شعب(2)
قوم خطي الصعب(2)
رفضك وجب(2)

وده فرض عين
***
مدد يا ثاير
يا عزم الخاير
ودليل الحاير
بركاننا الفاير

تحت الأراضين
***
ده الشعب قادر
وأمره صادر
وطوفانه الهادر

أهو بان للعين


******************************************************************************************************************************************************************
(4)يامهون(لحن)

يامهون..هونها علينا
عايشينها غربا في ترحيلا
شايلانا الغربة هيلا بيلا
حاطانا في الخيش والنيلة
غربتنا باردة طويلة

غربا حتى عن نفسينا
يامهون..هونها علينا
****
هونها يا ، يارب الصابرين
ع الصبر ماعدناش قادرين
م الدنيا، وم البني آدمين
بالجنة بنبات حالمين

وبنصحى على النار تكوينا
يامهون..هونها علينا
****
هونها يا الله يا عاطي
اغنينا عن العبد الواطي
سالب أمسي ويمي الآتي
حاجز حتى عمر ولادي

آسر باللقمة رقابينا
يامهون..هونها علينا
***
هيلا هيلا..يالله ياشغالة
اشتغلوا..وعلّوا السقالة
أكابرنا..عاملين رجالة
بالاسم..وعايشينها عوالة

واخدين لقمتنا منينا
يامهون..هونها علينا
***
عدينا زمن البشوات
بعديهم..زمن الظباط
دلوقتي..في زمن العصابات
صلبونا، وحكموا الشدات
مين من إيدهم هينجينا
يامهون..هونها علينا
***
هيلا هيلا يا شعب يامقهور
كفايانا من الضلمة دهور
لاجل ما عيننا تشوف النور
لازم قبله نهد السور
ولازم نغضب ونثور
ونرجّع حقنا بإيدينا
ويارب يسدد خطاوينا

************************************************************************************************************************************************

(5)ارفع صوتك

ياللي حابس بين ضلوعك
قهرك ونار خوفك وجوعك
ياللي غرقان بين دموعك
كل ده..وكاتم في صوتك

ارفع..ارفع
ارفع صـوتك

***
ياللي جسدك سجن روحك
ياللي محبوس جوّه بيتك
ياللي مدفون بالحيا
يعني حياتك زي موتك

ارفع..ارفع
ارفع صـوتك

***

ياللي بيتك صار مداسة
للوغد وكلاب الحراسة
وانت في لحظة صبحت سلعة
راكدة، في اسواق النخاسة
مهما كان دينك ولونك

ارفع..ارفع
ارفع صـوتك
***
ياللي مش سايب في جهدك
أي حاجة لاجل ولدك
نفسك بجد تقول "دي بلدك"
وانها هتصونه بعد
بس بتخونك حروفك

ارفع..ارفع
ارفع صـوتك

***
ياللي بتدوّر على ضل حيطة
أو بتسقف وسط زيطة
نار الظلم ما تحوشها حيطة
وصوت الحق ما تحوشه زيطة
حفرة الحيرة الغويطة
اخرج منها وحدد دورك

ارفع..ارفع
ارفع صـوتك

***
ياللي بتحلم كل ليلة
بأميرتك الحلوة الجميلة
إوعى تخجل من مشاعرك
إوعى مرة تخبي شوقك

ارفع..ارفع
ارفع صوتك
***
يارب يا سامع بكايا
حتى لو حايشُه في حشايا
انت عالم بالرزايا

ورّي للجبار جبروتك
سمّع كل ظالم صوتك
سمّع كل ظالم صوتك
سمّع كل ظالم صوتك
***
ياللي ظالمنا وقهرنا
انت سامعنا وشايفنا
مهما تعمل مش عارفنا
مهما كان علو سورك

بكرة صوتنا يهد سورك
بكرة صوتنا يهد سورك
***

************************************************************************************************************************************************
(6)موال
موال
عاشق بقول موال
عاشق أكون قوال
أوصف وجوه وأحوال
عن الزمان والناس
عن اللي حصل وانقال
***
عاشق بقول مواويل
عاشق لسحر الليل
لكن نهاري طويل
في نوره نار الويل
***
عاشق سطور مواويلي
مدادها ميّة نيلي
عطشى وشايفها بعيني
بتروي زرعة غيري


ما يسوى نعل مداسي
لكنه داس على راسي
ولإمتى هفضل أقاسي


ولأمتى هفضل اعاني
ولإمتى هفضل باكي
أسقي.. ومر في حلقي
اروي.. وارضي شراقي

***
عاشق بقول موواويل
في ذم كل عويل
أزعر قصير الزيل
خدام بين الحكام
وسيفه علينا سليل
***

عاشق بقول موالي
لابو الجبين العالي
بازل سنين وليالي
حافظ الطريق طوالي

حالم ..وعقله مانام
ثائر.. وعمره ما لان
أمام نخاس..ولا وسواس

غالي..وهيفضل غالي










ليست هناك تعليقات: